حج 573

د حج مسائل او احکام د حج قسمونه حج درې قسمه دی، او د هر یوه تفصیل لاندې ده: ۱- حج اِفراد افراد د “یوازې” په معنا دی. د حج افراد شرعي معنا دا ده چې حاجي یوازې د حج نیت وکړي او له میقات څخه د حج احرام وتړي، پکې عمره نه شاملېږي. د احرام تړلو پر مهال یو ځل داسې وایي: "اللّٰهم لبیك بالحج" یعنې: ای الله! زه د حج لپاره حاضر شوم. (بخاري 213) بیا مکې ته تر رسېدو وروسته د بیت الله طواف کوي چې ورته طواف قدوم ویل کېږي، او د احرام له ختمېدو پرته د ذوالحجې په اتمه نېټه منیٰ ته د حج د ادا کولو لپاره روانېږي. که د طواف قدوم وروسته د صفا او مروه سعی هم په هماغه وخت کې وکړي نو د لسو ذوالحجې د ګڼې ګوڼې له تکلیف څخه به خلاص وي. (ابو داود 2/160) په مفرد حاجي قرباني فرض نه ده، خو که د ثواب لپاره یې وکړي نو غوره ده. --- ۲- حج قران قران د “یو ځای کولو” معنا لري. حج قران دا دی چې حاجي د حج او عمره دواړو نیت وکړي او له میقات څخه د دواړو لپاره یو ځای احرام وتړي، او داسې وایي: "اللّٰهم لبیك بالحج والعمره" دغه حاجي به عمره ادا کړي، خو سر به نه خریېي او نه به احرام خلاصوي، بلکې په همدې احرام کې به د اتمې ذوالحجې لپاره منیٰ ته درومي. یادونه: رسول الله ﷺ حج قران کړی و. (مسلم 1/390) د حج قران حاجي ته یوه سعی بسنه کوي، که هغه د طواف وروسته سعی وکړي نو د لس ذوالحجې له ګڼې ګوڼې څخه به خلاص وي. (ابو داود) په قارن حاجي قرباني واجب ده، او که قرباني پیدا نه کړي نو لس روژې نیسي: درې د حج په ورځو کې او اووه په کور ستنېدو سره. (البقره 196) --- ۳- حج تمتع تمتع د "فائده اخیستو" معنا لري. که څه هم دا لفظ کله د قران لپاره هم کارول کېږي، خو ځانګړې معنا یې دا ده: حاجي د عمرې نیت وکړي او داسې ووایي: "اللّٰهم لبیك بالعمره" تر عمرې وروسته به سر خریېي یا به ویښتان کموي او احرام به خلاصوي. بیا د ذوالحجې په اتمه نېټه د حج لپاره له خپلې استوګنځای څخه بیا احرام تړي او وایي: "اللّٰهم لبیك بالحج" او منیٰ ته روانېږي. په تمتع کوونکي حاجي هم قرباني واجب ده، او که قرباني نه وي، نو هماغه د لسو روژو حکم دی لکه د قران په حج کې. (البقره 196)