کتاب البيوع 617

د قرآن کریم پر تدریس (ښوونه) باندې د اجرت اخیستلو حکم: پوښتنه: زه ماشومانو ته قرآن کریم حفظ کوم او میاشتنۍ تنخوا اخلم، آیا دا تنخوا زما لپاره جایزه ده که ناجایزه؟ ځکه موږ یوه واقعه اورېدلې وه چې نبي کریم ﷺ ته یو صحابي راغی چې یو څادر یې پر ځان و، کله چې ترې وپوښتل شول دا دې له کومه کړ؟ هغه وویل چې ما قرآن کریم ښودلی و او دا ماته د تحفې په ډول راکړل شوی، نو رسول الله ﷺ ورته وفرمایل: "آیا ته دا خوښوې چې دا څادر په قبر کې ستا لپاره د اور وګرځي؟" ځواب: له عبدالله بن عباس رضی الله عنهما څخه روایت دی چې د رسول الله ﷺ له اصحابو څخه یو څو تنه پر داسې ځای تېرېدل چې هلته اوبه وې. په هغو خلکو کې یو کس مار یا لړم چیچلی و، نو له هغو خلکو څخه یو تن راغی او ویې ویل: "آیا ستاسو کې څوک دم کونکی شته؟" یو صحابي ورغی او د څو وزو په بدل کې یې "سورة الفاتحه" وویله، هغه ناروغ روغ شو. کله چې صحابي وزې راوړې، نورو صحابه کرامو دا کار خوښ نه کړ او ویې ویل: "تا د الله په کتاب باندې اجرت واخیست؟" تر دې چې مدینې منورې ته راغلل او رسول الله ﷺ ته یې کیسه وکړه. رسول الله ﷺ وفرمایل: > "تر ټولو زیات حق لرونکی شی چې تاسو ورباندې اجرت اخلئ، د الله کتاب دی." (صحیح بخاري او نور) > له دې صحیح حدیث څخه معلومیږي چې د قرآن کریم پر ښوونه اجرت اخیستل سم دي. که یو څوک د قرآن کریم تعلیم ورکوي او خلک د هغه د خدمت په بدل کې ورته پیسې یا بل څه ورکوي، نو دا جایز دي او حرام نه دي. په پوښتنه کې د څادر په اړه ذکر شوې کیسه ماته معلومه نه ده. البته، که د کوم کس ګوزاره په سمه توګه کیږي او هغه د قرآن پر ښوونه اجرت نه اخلي، نو دا غوره او افضل کار دی.