لمونځ 516

د جمعې د لمانځه رکعتونه سوال: د جمعې د لمانځه ټول څو رکعتونه دي او په کوم ترتیب ادا کېږي؟ مهرباني وکړئ د کتاب او سنتو په رڼا کې وضاحت وکړئ. ځواب: د جمعې لمونځ یوازې دوه رکعته فرض دي. د دې فرضو نه مخکې د “جمعې” په نوم کومه ځانګړې سنت لمونځ په شرعیت کې نه دی ثابت شوی. البته څوک کولای شي د خپلې وسې او شوق مطابق نفل لمونځونه وکړي. لږ تر لږه دوه رکعت نفل ادا کول او بیا په جومات کې کېناستل مستحب دي، بې له دوو رکعتو کېناستل نه دي پکار. د سلمان فارسی رضي الله عنه نه روایت دی چې نبي کریم ﷺ وفرمایل: > "څوک چې د جمعې په ورځ غسل وکړي، د وسې تر بریده پاکیزګي وکړي، تیل یا خوشبو وکاروي، بیا له کوره راووځي، د دوو کسانو تر منځ بې‌ځایه نه کېني، بیا څومره چې وسه لري لمونځ وکړي، او د امام د خطبې پر مهال چوپ پاتې شي، نو د هغه ګناهونه چې د دې جمعې او تېرې جمعې تر منځ شوي وي، ټول بښل کېږي." (صحیح بخاري، باب الدهن للجمعه) له دې صحیح حدیث څخه څرګندېږي چې د جمعې له خطبې مخکې د وسې تر بریده نفلونه کول روا دي. د دغو نفلونو تعداد ټاکلی نه دی. که څوک د خطبې پر مهال جومات ته راشي، باید دوه رکعتې لمونځ وکړي او بیا کښېني، لکه څنګه چې په صحیح بخاري، کتاب الجمعه کې روایت دی: > نبي ﷺ وفرمایل: “کله چې ستاسو له منځه څوک د امام د خطبې پر مهال راشي، نو د دوه رکعتو له ادا کولو پرته دې نه کښېني.” په صحیح مسلم کې حدیث دی چې رسول الله ﷺ وفرمایل: > “څوک چې د جمعې له لمانځه وروسته لمونځ کول غواړي، څلور رکعتې دې وکړي.” او په صحیح بخاري او صحیح مسلم کې د عبدالله بن عمر رضي الله عنهما نه روایت دی: > “رسول الله ﷺ به د جمعې له لمانځه وروسته دوه رکعتې ادا کولې.” نو لومړی روایت قولی حدیث دی (په وینا باندې د رسول الله ﷺ لارښوونه) او دوهم روایت فعلي حدیث دی (د نبي ﷺ عمل). خلاصه: د جمعې فرض لمونځ دوه رکعتې دي. د خطبې نه مخکې د وسې تر حده نفلونه کول روا دي، خو شمېر یې ټاکلی نه دی. که څوک د خطبې پر مهال راشي، دوه رکعتې دې وکړي او بیا کښېني. د جمعې نه وروسته څلور رکعتې کول غوره (افضل) دي. که څوک یوازې دوه رکعتې وکړي، هم جائز دي.