عقايد 262

د غیر الله قسم، د مخلوق وسیله او دهغوی احکام د غیر الله قسم خوړل: په عربي کې قسم ته "حلف" ویل کېږي. له دې نه مراد دا ده چې یو حکم یا فیصله پخه کولو لپاره په خاص ډول د یو لوی او ستر ذات یا شي نوم واخیستل شي. او چونکې د غایت درجې تعظیم مستحق یواځې الله تعالی دی، نو د هغه نه پرته د بل چا قسم خوړل یا د قسم پر وخت د بل نوم اخیستل جائز نه دي. علماؤو کرامو په دې اجماع کړې چې قسم یواځې د الله تعالی او د هغه د نومونو او صفاتو خوړل کېدی شي. همدا راز دا هم د اجماع ځای دی چې د غیر الله قسم خوړل په هیڅ حال کې جائز نه دي، ځکه چې دا ښکاره شرک دی. په دې لړ کې د حضرت ابن عمر رضی الله عنهما روایت ډېر واضح دی، چې رسول الله صلی الله علیه وسلم فرمایلي: > "مَن حَلَفَ بِغَیرِ اللهِ فَقَدْ کَفَرَ أَو أَشرَکَ" (ترمذي ابواب النذور والايمان) ژباړه: «چا چې د الله نه پرته د بل چا قسم وخوړه، نو هغه کفر وکړ یا یې شرک وکړ»