عقايد 304
د صحابه کرامو د مناقشو په اړه د اهل سنت والجماعت د نظر وضاحت د صحابه کرامو ترمنځ د اختلاف سبب:
د صحابه کرامو د مناقشو په اړه د اهل سنت والجماعت د نظر وضاحت د صحابه کرامو ترمنځ د اختلاف سبب: د اهل سنت والجماعت عقيده دا ده چې د صحابه کرامو ترمنځ شخړې او اختلافات د اسلام او مسلمانانو پر ضد د يهوديانو د مکارانه سازش نتيجه وه. د دې سازش تر ټولو خبيث او مکار مخکښ د یمن يو يهودی عبدالله بن سبا و، چې يهوديانو راپاڅاوه. ده په دروغو د اسلام د منلو اعلان وکړ، خو په حقيقت کې يې په زړۀ کې د اسلام، مسلمانانو، او په ځانګړي ډول د دریم خليفه حضرت عثمان رضی الله عنه پر ضد سخت حسد او کينه پټه کړې وه. عبدالله بن سبا دا زهر خپرول پیل کړل، پر حضرت عثمان رضی الله عنه يې بې اساسه تورونه جوړ کړل، او د خلکو تر منځ يې خپرول پیل کړل. ځينو کمزورو ايمان لرونکو، کوتاهبينو، او فتنه خوښو کسانو له ده څخه اغېز واخيست او د ده تر شاوخوا راټول شول. د همدې فتنه ګر سازش په نتيجه کې حضرت عثمان رضی الله عنه مظلومانه ډول شهید کړای شو. د حضرت عثمان رضی الله عنه له شهادت وروسته د مسلمانانو ترمنځ اختلافات پیل شول. د عبدالله بن سبا او د هغه د پلویانو په لمسون سره فتنه راپورته شوه، او صحابه کرام ـ د خپل خپل اجتهاد له مخې يو له بله سره اختلاف ته ورسېدل.
