عقايد353

د امام ابو حنيفه رحمه الله اقوال د تقدیر د مراتب په اړه: (۱) یوه سړي د تقدیر په اړه له امام ابو حنیفه سره مناظره کوله، نو هغه ورته وفرمایل: "آیا ته نه پوهېږې چې د تقدیر په اړه فکر کول د لمر سترګې ته کتو ته ورته دي؟ چې هر څومره ورته ډېر وکتل شي، همغومره حیراني ډېریږي!" (قلائد عقود العقيان، ق ۷۷ ب) مطلب دا دی چې د تقدیر ژور بحث او مناظره د انسان عقل ته ستونزمنه ده، او دا یوه غیبي موضوع ده چې باید محتاطانه ورته وکتل شي، نه دا چې انسان پکې سرګردانه شي. (۲) امام ابو حنیفه رحمه الله وايي: "الله تعالی له ازله نه د ټولو شیانو علم درلود، مخکې له دې چې موجود شي." (الفقه الأکبر، ص ۳۰۲، ۳۰۳) (۳) وايي: "الله تعالی معدوم شی پداسې حال کې پېژني چې هغه معدوم وي، او دا هم پېژني چې که یې پیدا کړي، څنګه به وي؛ او موجود شی هغه مهال پېژني چې موجود وي، او دا هم پېژني چې څنګه به فنا شي." (الفقه الأکبر، ص ۳۰۲، ۳۰۳ (۴) امام ابو حنیفه رحمه الله فرمایي: "او (الله تعالی) د هر شي اندازه او تقدیر په لوح محفوظ کې ثبت کړی دی." (الفقه الأکبر، ص ۳۰۲)