عقايد 437

د رښتني توبې حیثیت سوال: که یو ځوان هلک د یوې ځوانې نجلۍ په لمسون او فریب کې راشي او زنا وکړي، سره له دې چې پوهېږي دا کار په اسلام کې حرام دی، خو بیا هم د شیطان په وسوسه کې راشي، او وروسته له دې چې ګناه وکړي نو پر خپل عمل پښیمانه شي او په ریښتیني زړه توبه وباسي او عزم وکړي چې بیا به داسې ګناه نه کوي؛ نو ایا د هغه توبه الله جل جلاله قبلوي؟ (کامران ) ځواب: کله چې یو انسان د شیطان په لمسون کومه ګناه وکړي، بیا په ریښتیني زړه د الله تعالی څخه بښنه وغواړي؛ نو الله جل جلاله معاف کوونکی دی. الله تعالی فرمایي: "ای مؤمنانو! د الله په لوري په ریښتیني زړه توبه وباسئ." (سورة التحریم: ۸) او په بل ځای کې فرمایي: "ای مؤمنانو! ټول د الله په وړاندې توبه وباسئ، تر څو چې تاسې کامیاب شئ." (سورة النور: ۳۱) د سلو کسانو د قاتل کس کیسه: په بخاري او مسلم کې د هغه سړي قصه ذکر شوې چې سل تنه یې وژلي وو، خو کله چې د ریښتیني توبې اراده یې وکړه، یوه عالم ورته لارښوونه وکړه چې د یوې داسې سیمې پر لور لاړ شه چې هلته خلک د الله عبادت کوي. په لاره کې مرګ ورغی، خو د رحمت پرښتو د هغه روح له ځانه سره یووړ. د زنا کوونکې ښځې پېښه: همدارنګه یوه ښځه زنا وکړه، وروسته یې د خپل عمل له امله شرم او پښیماني محسوسه کړه، رسول الله صلی الله علیه وسلم ته راغله او د حد غوښتنه یې وکړه. وروسته له دې چې رجم شوه، رسول الله صلی الله علیه وسلم د هغې جنازه وکړه. حضرت عمر رضی الله عنه وویل: یا رسول الله! تاسې د یوې زناکارې ښځې جنازه کوئ؟ رسول الله صلی الله علیه وسلم وفرمایل: "هغې داسې توبه کړې ده چې که د مدینې پر اویا کسانو وویشل شي، ټولو ته به کافي وي." (صحیح مسلم او نور) د بخاري او مسلم حدیث: په بخاري او مسلم کې راغلي: "هر څوک چې توبه وکړي، الله تعالی یې توبه قبلوي." د رښتني توبې شرطونه ۱. له ګناه څخه لاس اخیستل – هغه ګناه پرېږدي چې پرې اخته شوی و. ۲. پر ګناه پښیماني – د زړه له کومې په هغه عمل شرميدل او د خپل تېروتلي کار پر وړاندې نادم کيدل. ۳. کلک عزم – دا ټینګ هوډ ولري چې نور به هېڅکله دې ګناه ته نه ورځي. لکه څنګه چې په ریاض الصالحین (باب التوبة) کې ذکر شوي: هر څوک چې له خپلې ګناه څخه شرمېدلی وي، هغه پرېږدي او د راتلونکي لپاره کلک اراده وکړي چې دا کار به بیا نه کوي، نو الله جل جلاله د داسې بنده توبه قبلوي.