طهارت 464

د لمانځه پر مهال که څوک بې‌ اودسه شي، څه وکړي؟ سوال: که د مقتدي (ماموم) اودس د لمانځه په منځ کې مات شي، نو هغه څنګه له جماعت څخه ووځي؟ د صحيح حديث له مخې رهنمايي وکړئ. (ابو انجشه – ) ځواب: که د لمانځه په منځ کې د مقتدي اودس مات شي، نو هغه دې خپل لاس په پزه کې کښېږدي او له جماعت څخه دې ووځي. بیا دې اودس تازه کړي او له سره دې جماعت ته داخل شي. کومه برخه د لمانځه چې پرې شوې وي، هغه دې بېرته پوره کړي. په سنن ابی داود کې د عایشه صدیقه رضي الله عنها څخه روایت دی چې رسول الله صلی الله علیه وسلم وفرمایل: «إِذَا أَحْدَثَ أَحَدُكُمْ فِي الصَّلَاةِ فَلْيَأْخُذْ بِأَنْفِهِ، ثُمَّ لِيَنْصَرِفْ» ژباړه: "کله چې له تاسو څخه د چا اودس د لمانځه په منځ کې مات شي، نو دې خپل لاس په پزه کې کښېږدي او له لمانځه دې ووځي." نو څرګنده شوه چې هغه څوک چې د لمانځه پر مهال بې‌ اودسه شي، دې خپل لاس په پزه کې کښېږدي او له جماعت څخه دې ووځي. د پزې نیول د دې نښه ده چې د هغه اودس مات شوی دی.